串 (已結業)

有一次經過尖沙咀其中一條街想行去紅磡火車站，點知見到有間串燒店，就決定下次一定要嚟試吓佢。咁轉眼間就到咗呢一日，雖然唔大間但係都有幾個位坐低堂食，仲有佢袛係開夜晚。咁我就坐低食，因太肚餓了！都諗咗陣就叫咗好幾樣：雞泡魚乾、燒茄子、鹽燒牛脷，燒鱔柳。全部等咗陣佢就整好了，首先嚟咗雞泡魚乾先，原來真係雞泡魚嚟，再用味醂方式去燒烤佢，真係幾特別！仲要幾好食😋呢樣食過番尋味；之後就嚟咗兩件牛脷，嘩！好厚呀塊脷，好少出去食牛脷會咁厚上碟，加上用咗鹽去燒佢，所以更加出汁！值得再試吓呢樣；再嚟就係燒鱔柳，呢樣佢反而無特別推介，但係我好鍾意食鱔嘅，所以唔會放過！點不知無叫錯仲想叫多幾份！起多汁又厚肉，仲好香又入味，無腥味重鹽味，又可以保持住鱔嘅味道！！！我勁鍾意食呢樣👍🏻最後就到燒茄子，佢唔係就咁一般咁樣去燒，而係灘開佢再加蒜茸同鹽去燒佢，所以十分好食，當食吓菜咁。另外仲有手撕雞芝士烏冬，同其他串燒，同燒雞扒，如果係外賣番屋企配啤酒就真係不得了的配搭！手撕雞好夠辣，配上芝士烏冬岩岩好，可以中和少少的辣味又唔會好咸～