億饍 (已結業)

好耐無落旺角了，今日經開呢頭望見譽發廣場個牌，令我想起億饍同佢地嘅燉湯。雖然呢度款式選擇多多，但有左上次經驗，今次醒目地一坐低即刻落左燉湯先。而除左燉湯之外，仲有泰越式小食、炒粉麵飯、冬蔭功火鍋同龍蝦都有得食呀。先黎呢個花膠烏雞香菇燉湯，一睇就知夠晒足料，而且花膠養顏，烏雞補血，係女仕嘅最佳選擇。另一個就係花旗參烏雞排骨燉湯，花旗參味道濃厚，而且甘香味美，每一啖都係精華。一客4件嘅越式蒸粉包，用皮薄餡靚黎形容就最貼切。鮮蝦夠晒大隻，口感十足。order左兩件燒紐西蘭羊架，肉汁豐富加上有少許脂肪，食落更香滑美味。由雞牛豬肉組成串燒3兄弟，點上特製沙嗲醬，香濃惹味。蝦餅炸得金黃香脆，沾上濃濃嘅酸甜醬，真係皮脆肉彈香味足呀。通常我地都會叫小食拼盤，但呢度個蝦餅實在太吸引啦，小食拼盤根本唔夠分。所以呢個絕對要推介。最後仲有呢個越式炒金邊粉，幼身金邊粉幼滑爽口，配上扎肉、鮮蝦等，而愛辣嘅可隨意加上辣醬，味道香濃可口。