拉麵凪 (已結業)

好多朋友都話食拉麵一定要試下 拉麵凪（讀「休」），佢地嚟左銅鑼灣之後都無機會試過，咁啱路經附近一於去試試佢～ 佢嘅位置係喺好多小販檔賣野嘅渣甸坊（唔係好多小巴站嘅渣甸街），店內嘅位置唔算好多，主要都係「面壁」座，點餐同好多拉麵店都一樣喇， 畫紙仔，無咩特別古惑位嘅叫左 超濃厚黑骨 同埋 濃厚綠骨， 黑骨係黑蒜， 綠骨就係羅勒加芝士粉， 份量係似日本嘅份量，唔算好大， 如果大胃嘅朋友建議叫埋替玉，湯頭唔算好油，湯連麵 食晒成碗負擔其實ok 叫埋佢兩個小食：日式豚餃 同埋 阿波尾雞翼。 兩個小食都幾有驚喜， 餃子上面係蘿蔔蓉溝左醬油，唔洗點又可以降低油感，唔錯。 阿波尾雞翼係即炸， 留意上枱嘅時候係熱到食唔到同入面有油， 請小心。 味道都幾好， 甜醬油配芝麻有少少名古屋雞翼嘅感覺。其實如果食拉麵有返咁上下年資嘅朋友， 都一定覺得佢地拉麵嘅款式熟口熟面喇，原因大家可以上網搵下，好多報導都有講，所以對「老司機」嚟講驚喜就應該不大。同埋店內嘅冷氣都幾勁，令到碗麵好快就凍晒，呢樣野係的確有啲失色，特別對於我地呢啲「相機食先」嘅朋友要留意返