蘭香茶餐廳 (已搬遷) 新店位置

成日放假都嚟蘭香，今次第一次寫佢…一如以往，禮拜六日放假都係要等位，排三兩個唔定，排十個八個人又唔定，上星期六午餐時間我就等左三張檯，大概十五分鐘度，都可以接受。嚟到都係叫返B餐，太陽蛋、轉炒意、轉鮮油多；屋企人就嗌左個蘭香炒飯、咖喱牛腩炒伊麵。所謂B餐炒意，即係叉燒炒意，配呢個餐當然係細細碟咁啦，有兩三片薄叉燒，配豉油老抽炒意粉，唔會話好好味，不過隔一陣又想食咁啦。煎太陽蛋好正，半生熟，隻蛋黃浪浪下，加少許鹽食就perfect!!不過如果d火腿輕輕煎下就更好味啦食呢度鮮油多，記得嗌免飛邊，即係唔切麵包皮…即烘多士夾住厚厚凍牛油！好鬼肥，但好正呀！記得一上檯要即食！外熱（多士）內冷（牛油）真係好鬼正！至於杯餐飲，如果要熱飲，可以加錢轉大杯；如果嗌凍飲，咖啡奶茶鴛鴦記得嗌沖濃d…個人覺得茶啡方面比較淡。蘭香炒飯 - 一如以往香味十足，配料尚算豐富咖喱牛腩炒伊麵 - 留意咖喱牛腩唔係撈埋落伊麵度炒，係分開上的；牛腩有幾舊，有肥有瘦，都幾淋，不過咖喱唔太辣。炒伊麵乾濕適中，分量都幾足。總括嚟講，都係會繼續去食，依家都要多支持呢類舊舖老店呀！