寶寶雞煲 (已搬遷) 新店位置

前幾日啱啱去完花墟，就約咗朋友喺太子食嘢。天氣開始轉涼，於是我哋就打算去食雞煲，今次我哋夜晚8點左右去咗寶寶雞煲，直接walk-in就有位啦！間舖有兩層，我哋坐樓下，雖然店舖唔大，但坐得都算舒服～店員服務唔錯，一坐低就俾咗個秘製醬汁俾我哋，醬汁咸咸地，加上少少辣椒作點綴，非常開胃！落咗單唔到10分鐘，店員就上咗個雞煲，佢用左傳統既芫茜、京蔥、三色椒同埋麵豉醬等，煮得香口惹味，剩係上枱聞到果下已經流哂口水～雞煲可以揀半隻／全隻嘅冰鮮雞／走地新鮮雞，而雞煲就有得揀超微辣、微辣、小辣、中辣、大辣～食完雞煲店員就幫我哋加清湯，清湯加埋雞煲嘅味道好夾，仲有d清甜～牛肉係本地新鮮牛肉，重牛味同嫩滑，幾新鮮！豚肉都算嫩口，份量比牛肉多，而且無雪味，肉質香口之餘又不至於太肥～炸魚皮好香好脆口，亦好乾爽～炸響鈴望落同平時喺街市買開一盒盒嘅唔同，雖然好新鮮，但係略嫌唔夠脆口～最後食埋魚腐，佢哋稱得上「魚腐大皇」，就當然要一試啦，食落去唔會油膩，亦唔會太過鬆散，好惹味！總括黎講，呢間食物質素高，嘢食新鮮，服務態度都幾好，可以一試！