祥興記上海生煎包 (已結業)

市面上愈黎愈多食到生煎包嘅地方，講到表表者點都會數到祥興記。但自從荃灣、元朗店結業後，都有一段時間冇食過。期間不時都有試其他食店嘅生煎包，水準參差，所以有時都會諗番起祥興記嘅味道及其爆射湯汁。今日去到將軍澳，本來係想食早餐，去到food court，咁啱見到呢度有祥興記，二話不說就坐低。比起舊時佢地都加入左啲新口味，例如黑松露、鮮蝦生煎包，可惜剛剛售罄，未有機會一試，只係點左套餐。套餐包括4粒生煎包、上海雙檔粉絲、柑桔汁，定價 $60。生煎包賣相、大小同以往差唔多，根據經驗，都係先咬一小口，飲左裡面嘅湯汁先，因為咬開，都有爆汁效果。而且湯汁熱辣辣，肉汁香，相對以前，湯汁係少左，但肉餡份量多，食落唔會太鹹，而且唔油膩。生煎包皮都唔算太厚身，底部煎得香脆，配埋辣醬正。上海雙檔粉絲上海雙檔指百頁包肉、油麵根包肉，加入粉絲、蛋絲、榨菜、蔥花製成湯。湯頭點都有味精感，幸好唔會太鹹或者泛油，肉餡或多或少跟生煎包嘅肉同出一徹，味道都唔會太差。唔係好多地方食到呢類傳統小食，感到滿足。柑桔汁清新唔甜，有助解膩。雖然食祥興記生煎包冇以往咁有驚喜，但至少味道好對辦，依然比一眾後起嘅食店出色。