吞POT 雞煲火鍋.住家菜 (山林道) (已結業)

今晚同密友們打邊爐，抱住愉快同期待嘅心情黎到呢度食雞煲！叫左雞煲翅湯底，貪佢湯濃，又無醬油炒咁咸，同無咁油膩嘛，4個人叫左1隻雞，原來份量好足料！我覺得夠6至8個人食！仲有好多翅，湯底奶白色勁香濃，未打邊爐先飲2碗湯！食左一輪雞煲翅，開始打邊爐喇，白鱔肉質睇落去肥美晶瑩，份量亦都唔少，食落爽口鮮嫩，係火鍋不二之選。芝士響鈴都係第一次食，即炸效果非常特出，浸2秒後即食，食落好香脆，半溶芝士係響鈴中間流出黎，有創意。一向對牛小排情有獨鍾，今次都係叫牛小排！半價左140蚊有咁大碟真係好抵食！份量係多到驚人，而且質素最重要，肉質夠爽嫩，肉味濃，油花分佈平均，係非常高質嘅火鍋配料。就到時間嘅一定要享用配料半價優惠。性價比高，服務亦週到，同朋友黎打邊爐談心最開心不過。