聰嫂私房甜品 (已結業)

出嚟做嘢之後，好耐都冇過嚟將軍澳呢邊，今日難得過嚟行街，就梗係要去聰嫂食下回憶啦！隔咗咁耐，仍然係好多人食要等位，不過得2個人都好快就入得喇。個人覺得必食嘅必定係士多啤梨西米冰！(好似以前係叫士多啤梨西米露？！)呢個西米並唔係一般嘅西米，最中意佢係好似刨冰咁嘅質地，夏天行到熱辣辣食真係好消暑。呢碗西米最特別嘅係，佢碗入面會有啲好似西米大小咁嘅爆珠好有口感！而佢嘅西米係另上嘅。以前次次都係食士多啤梨西米冰，今次就試下其他，嗌咗個哈蜜瓜豆腐花。同士多啤梨西米冰一樣好有賣相，望落都已經覺得好味！食落去仲有驚喜，好fresh，隻味好清甜唔係好漏個種，相比起士多啤梨西米冰係冇咁甜，而且濕濕地幾解渴。估唔到今次會搵到新寵，下次一定會encore🍈😋