蛇王兄

營業中

休息中

自從香港冇咩冬天之後，而且蛇羹又加價加到好貴，已經食少咗好多蛇羹啦。今日專登去蛇王兄，試一試久違嘅蛇羹餐，聽聞呢度係被譽為「被蛇羹耽誤嘅雞飯」蛇店。我哋兩個人，叫咗一個大蛇羹餐，阿姐建議我哋，一碗雞飯轉一碟雞飯，加$15,抵好多。首先，形容下環境，都係一般蛇店坐面壁位，全店滿座，好彩唔使等位。店內嘅員工都好親切。舖頭都好乾淨。睇到配料，蛇羹嘅靈魂薄脆，應該就係買返嚟㗎啦，比較硬小小，檸檬葉，如果切幼啲會更加好。講返蛇羹，我哋叫咗個大蛇羹，都幾大碗，入邊好多料，好多肉，味道都好好，唔會水汪汪，濃淡適中。我最欣賞就係佢嘅蛇湯，好鮮甜，飲完覺得好滋潤，好好咁。蛇湯入邊有好多料有龍眼杞子淮山牛蒡同埋陳皮。飲完成個喉嚨舒服晒。靈魂人物雞飯，阿姨俾咗雞髀加雞翼，好嫩滑，正常好食嘅味道，可能之前啲人講到太誇張，所以冇乜驚喜。阿姨話，蛇湯下次叫個大嘅，加多$15,就等於兩碗細嘅，下次試吓先。我哋食完，因為出面冇人等，阿姨話可以坐多陣，冇趕我哋走。買單可以用八達通或者現金。下次可以試埋佢嘅糯米飯先。