尚鮮海鮮料理 (已結業)

朋友推介呢間火鍋店，因為知我好鍾意打邊爐，而且呢度啲湯底好特別吓。六點半上到黎，都已經有七成客人，食食吓更加全場爆滿，好旺場呀！坐位都好寛敞喎。我哋就揀咗川貝海底椰燉鱷魚排湯，係一個養生燉湯，營養潤肺，而且限量發售。當中有啲鱷魚肉同埋瘦肉，亦有啲雞腳，都好足料，幾好飲。火鍋食肥牛是指定動作吧，特尚手切牛（中）份量都唔少，係用手起雙飛咁樣切，牛味唔錯。最特別係四色丸尚盛，四種丸入面都有唔同嘅餡料，咬落去先知係咩餡，令人大有期望。紫薯蓉、黑松露、鹹蛋黃、芥末籽，四種餡都好有特色。叫返個羽衣甘藍，高纖又抗癌，係近期大熱，不過纖維會有啲粗，要淥耐啲先得架。百花釀油條可以當小食，一啖咬落去油炸鬼脆卜卜，好香口。亦都可以蘸湯食，兩種食法各有千秋。最正係木耳鮮蝦雲吞，真係成個乒乓波咁大粒，好誇張！ 入面餡料十足，無論係蝦、豬肉、木耳全部都好爽口，呢個做得好出色，大愛。配兩杯特色飲品：青檸梳打同洛神花蜜，爽呀！重點一提係店員態度親切友善，又好給力，服務五星。