新潮樓 (已結業)

一通關即刻有親戚返嚟，仲住埋喺我屋企，於是乎就近近哋去EMAX搵食。外國返嚟當然想食中菜，最後就揀咗新潮樓。呢度地方夠大，如果鍾意環境寬敞有空間感嘅，呢度真係不二之選。星期五六日仲有Live Band喺度演出，夠晒氣氛。每次食潮州菜，有兩款必點嘅菜式，其中一款就係滷水鵝片，而且仲有得揀選自由配搭雙拼同三拼。滷水鵝片當然就係主打，佢嘅鵝片唔算有太多肥膏，但係食落口感仍然係軟滑唔會太韌，加上佢嘅秘製滷水汁又唔會過鹹，整體感覺都好好。墨魚都係另一款受歡迎嘅滷水菜式，墨魚既彈牙又爽口，每片都夠大塊，揀呢個配搭完全唔會後悔。原本想揀豆腐，不過店員話豆腐唔靚，最近冇做滷水豆腐，最後我哋就揀咗豬耳，脆卜卜嘅軟骨，配上入味嘅豬皮，呢個份量淺嘗一下啱啱好。另一款潮州菜必點菜式就當然係香煎蠔仔洛，佢嘅做法同出面有啲唔同，粉漿嘅比例比較多，所以就零瀉脆口，但我個人就比較鍾意蛋漿比例多啲嘅口感，不過佢都勝在每隻蠔仔夠大隻，所以整體都唔錯嘅。自家製蝦蟹棗粒粒都夠晒大粒，蝦棗彈牙而蟹棗就夠鮮味，最鍾意佢有得雙拼，人數唔多都可以食到。潮州嘅蔬菜類就一定揀排骨春菜煲，呢個春菜煲嘅湯相對較清，仲有好多薑粒，可以驅走芥菜