新越越式料理 (已搬遷) 新店位置

D人成人話去九龍城食泰菜，九龍城同泰菜好似有關係咁，不過我就唔信九龍城無其他好野食，比我係福佬村道，見到間新越🌜，聽個名就知食越南野啦，望入去，見佢個裝修都好新穎簡潔，樓底又夠高，就去試試佢！本身我想食海南雞飯，點知賣晒，就叫左佢個生牛肉湯河，佢寫明係用美國安格斯牛肉，但價錢唔貴，都只係46蚊，而老公就叫左個越式扎肉炒金邊粉51蚊。由於無食早餐我地仲叫左兩個小食，越式豬頸肉56蚊，仲有芝士蝦丸62蚊。跟餐叫青檸梳打都係加8蚊，抵呀！生牛肉湯河湯底清甜，睇翻先知原來佢個湯係用牛骨，牛肉，牛尾慢火熬出黎，完全無味精味，另外用左美國安格斯牛，所以牛味好濃又一d都唔肥，正呀！越式扎肉炒金邊粉老公話油左d，不過加左d青檸汁，又幾fresh喎越式豬頸肉分量適中，而且個邊燒得好香口，食落甜甜地，好味！芝士蝦丸係我最期待嫁，一碟6粒，外層香脆，蝦丸彈牙，一咬開就有溶梗出黎既芝士，感覺好豐富！坐坐下見到職員轉下午茶menu，原來又平幾蚊，下次我都可以等多陣。