越南米紙 (已結業)

朋友約淘大睇九點半，收工去到附近食個飯先，淘大商場無咩啱食，行下行下，行到過牛頭角街市後邊安基苑商場，見到呢間越南野有人等緊位，反正有排未夠鐘，試下佢等左十分鐘到，有人埋單就安排入座，餐廳不算太大，大約十零張檯，我地坐二人單邊卡位睇下餐牌，食物正宗越式，蝦餅，檬粉之類，選擇都幾多，見到晚餐連飲品都係七八十元幾抵，一人叫左一個。我點左個泰妃雞飯，類似海南雞飯，飯呈金黃色，上桌時滲出濃濃椰汁味，加埋特製薑蓉，味道很醒胃，泰妃雞肉表皮爽滑，雞肉夠腍第一時間食左隻雞脾仔，點埋甜豉油，味道一流好友點左香茅豬扒撈檬，檬粉都頗大碗，檬粉很爽口，撈埋檯面秘制醬汁，酸酸甜甜，味道非常清新，跟餐的越式炸春卷，入邊包左紅蘿蔔絲，外層炸米網紙，很香口有咸香，比之前其他地方食過嘅好味。我地每人仲加錢叫左菠蘿及芒果沙冰，叫餐可以六折價錢點選，都幾抵，即叫即打，兩杯味道都很濃，飲到最抵都很夠味，值得推介。食完埋單，兩個人二百元有找，相當抵食。