雲壽司 (已結業)

之前喺中環食過一次雲壽司，性價比好高，價錢雖然唔貴，但刺身由日本空運直送到港，質素新鮮！所以當知道九龍區開咗分店後，老公就嚷著要我同佢再去食！北海丼($188)刺身鋪滿整個碗，一個丼有齊吞拿魚腩、油甘魚、赤貝、牡丹蝦、海膽、三文魚及三文魚子，非常豐富！每塊刺身都好厚切，口感飽滿。吞拿魚腩油脂密佈，有入口即溶嘅感覺！油甘魚肉質細嫩，魚味香濃！赤貝都好新鮮，口感爽彈！海膽色澤同賣相都好好，無岀水情況，入口鮮甜唔腥！特上壽司拼盤($250)拼盤有吞拿魚腩、深海池魚、牡丹蝦、赤貝、海膽、三文魚子、火炙左口魚邊、鯖魚、魴鮄魚、蔥吞拿魚腩壽司10件壽司，每件都係師傅即點即握。壽司握得唔錯，唔會握得太實或鬆散。呢個壽司拼盤嘅款式比北海丼嘅多幾款，比較特別嘅係有魴鮄魚。印象中喺omakase食過，估唔到呢晚都有得食！魴鮄魚油份唔多，但肉質鮮甜爽口！深海池魚油份則非常豐腴，口感肥美！左口魚邊油脂甘香，飯粒吸收魚油後唔單止更加香口，亦減低膩感。