東寶小館 (已搬遷) 新店位置

北角街市久聞其大名的東寶小館，今晚終於一試，味道確係唔錯，但二人食用菜式選擇不多，樣樣大份三五成群聚餐來食比較合適。南乳炸豬手 $158豬手無咩肉以食皮為主，有10件多見到好驚訝，因為我地只有二人食，餐牌無寫感覺中伏，每人至少食5件，今次真係食到我地驚驚。上菜時豬手熱辣辣好燙手，豬皮炸得唔脆，唔多油比較乾身，豬皮唔太硬煙靱口感，味道還可以，有南乳醬汁可蘸，醬汁溝稀左味道唔太咸，蘸下食無咁膩，食一件起兩件止三件就好膩，再多食會無晒胃口。雲耳粉絲雜菜煲 $118大大煲份量十足，唔駛叫飯食完成煲都飽，湯底清清地味道唔錯，雲耳、西蘭花、蝦米、草菇等材料豐富，健康菜式好選擇。炸墨魚膠鵪鶉皮蛋仔 $76要order兩粒起，差唔多要四十蚊粒，覺得有點貴，好奇一試的確好味，墨魚膠彈牙內有皮蛋仔雙重口感，蘸上蜜糖薑蓉清甜好味幾特別。