籠太子點心專門店 (已結業)

今日喺筲箕灣東大街，去咗呢間籠太子點心店。是日推介蟲草花豬骨例湯，叫咗一碗，份量非常之大碗，而且用料充足，絕對唔係茶餐廳嘅例水，飲得出有火候。之後叫咗佢哋嘅燒賣，呢度嘅燒賣係可以兩粒一籠，所以兩個人嚟食都好方便。潮州粉果，外皮晶瑩剔透帶點煙韌，裏面配料都幾豐富有沙葛花生蝦米蔥頭。不是炸兩，腸粉皮包包住一條炸春卷喺裏面，每碟新鮮即製，所以中間嘅炸物，仲係好香脆，加埋粉腸粉及豉油調味，口感豐富。鹹水角味道正常，不過一碟有四件都幾抵食。香煎蘿蔔糕咬落中間有蘿蔔條，蘿蔔算清甜，最緊要點舖頭提供嘅蝦將軍-辣椒油，辣椒油裏面有啲炸過的蝦米蝦乾，非常香口，帶少少XO醬嘅味道，海鮮味香濃，配埋蘿蔔糕非常配合又惹味。蝦將軍炒腸粉，就係用佢哋自家製嘅辣油去炒腸粉，有啲似星加坡食炒粿條，配料有少少叉燒及青紅椒，帶少少辣味，味道香濃，而且非常大碟。兩個人埋單$160連埋茶錢，價錢公道，而且點心都係即叫即蒸，所以幾適合兩個人晚餐時段去嘆吓茶！