鈴木珈啡館 (已結業)

星期五嘅晚上8時，同老細响銅鑼灣搵嘢食，呢間唔使等位，貪方便就入咗去。又貪方便，叫二人餐洋蔥湯 - 太鹹，好難飲，記憶中飲過最差嘅洋蔥湯，每人都係飲咗兩啖；三文魚沙律 - 半生熟三文魚還可以，沙律汁不俗，全餐至入得口嘅就係呢個唔使點煮嘅沙律；炸雞 - 唔可以話難食，不過就遠遠比唔上老麥；三文魚菠菜汁墨汁意粉 - 味道不俗，墨汁意粉咬口尚可，不過碎濕濕，不合格；芒果咖哩軟殼蟹飯 - 全餐嘅經典，上檯嘅係芒果咖哩軟殼蟹飯走咖哩加芝士，芒果汁係芒果糖味，芒果粒係凍嘅，芝士無芝士味，珍珠米超硬，好似生生地，祗有炸軟殼蟹可以入口；餐茶兩杯咖啡，兩大杯意大利咖啡 + 兩小杯steamed milk，未飲就知超難飲，入口就得一個苦字，完全唔覺有咖啡香味，一間自稱cafe沖啲咁嘢出嚟俾客，比港式難飲茶記咖啡更不如，其實呢間嘢嘅management有冇飲過佢哋自己嘅咖啡o家？呢一餐，盛惠二佰伍拾個大洋，剩咗大半嘅食物，貪方便嘅結果，就係食到shit shit 聲，踩咗今年最大嘅一篤屎。