和順記 (電氣道)

營業中

休息中

開頭和順記喺天后開分店嗰陣，幫襯過一次已經俾佢嘅神級炸脾深深吸引。嗰次食炸脾感覺良好，因為第一次食到炸脾係外脆內嫩兼爆汁，算係我暫時食過最好食嘅炸脾。今次再度幫襯，當然炸脾雞蛋飯必定叫，再新試多一個芥末牛柳黑松露蛋飯。前者個炸脾炸過咗火，因為整體無乜肉汁，無咁嫩滑，個脆皮就依然keep到。後者係意外地好食，個牛柳好嫩，配埋芥末汁又幾惹味。而黑松露蛋又真係食到有黑松露味，因為好多時喺出面食都未必食到有味。PS. 差唔多食飽嘅時候，餐廳負責人問我哋啲食物質素時，我哋都有表達炸脾炸得太過嘅問題，負責人即時叫廚房再炸過一隻俾我哋試味。本身真係飽到上心口，負責人嘅熱情款待只好接受。今次呢隻就真係食返第一次嘅感覺，又爆汁又外脆內嫩，大滿足。好想俾返個credit 呢間餐廳，因為呢個跟進action你會睇得出佢哋係有心想提供最好嘅食物俾食客，所以會再繼續幫襯。