麻辣串串香 (已結業)

商場牛下主題區將小店區同FOOD COURT加入牛下嘅色彩，從天花舊物掛飾，牆身壁報版同小店縷花鐵閘，大打本土情懷。 FOOD COURT大部份提供街頭小食以響應牛下新城主題。連枱櫈都發揮創意，用汽水籃墊底，而屏風板就用舊式酒樓雕花設計，營造懷舊氣氛。 麻辣燙$32食法好似車仔麵，寫完點菜紙即叫即煮，保證熱辣辣。食麻辣燙，我最鍾意點啲會大量吸收湯汁嘅配料，所以除豬腩肉外全部係素菜。豬腩肉切得夠薄，索晒湯汁又爽口，湯底麻辣夠勁，所有材料好似海棉咁盡吸湯汁，食完成口麻晒成身暖晒。雖然以前喺牛下無食過類似嘅嘢，但今日身置呢個充滿回憶嘅地方，熱熱鬧鬧，淨係食氣氛都已經心滿意足，期待下次再試其他風味小食。