享樂烘焙

營業中

休息中

其實我住得距離新蒲崗唔係好近，但係有時得閒有嘢做要出新蒲崗嘅時候就會超期待，因為有享樂烘焙好想買麵包！！！我一直以來成日都買黑眼豆豆，佢係朱古力麵包入邊包住朱古力醬，如果拎返屋企叮熱啲嚟食嘅話入邊會變咗流心，好好味！！但係我啲屋企人就唔係太鍾意，覺得佢偏甜。另外我又係超鍾意食明太子麻糬燒，入邊有煙韌嘅麻糬！今日難得搞搞新意思，想試吓另外一啲麵包~~今次買咗：(唔好意思我唔係好記得啲名)✨明太子米卷：好味！明太子醬好足！麵包入邊落咗米粉，所以好有米香。✨芝士條：好味！上面有少少沙律醬，所以成個麵包食落鹹鹹甜甜。享樂嘅麵包真係唔會令人失望，但對我來講價錢有少少貴XD 不過呢啲嘢一分錢一分貨啦！