Explore Kitchen (已結業)

係旺角鬧市行街行到有啲攰，想搵個地方食下野坐下，先發現係彌敦道562號原來有棟新大廈，入面4樓係一間叫Explore Kitchen嘅餐廳，全間餐廳都用落地玻璃窗，好光猛，我地坐係落地玻璃窗前，望落下面就係人來人往嘅彌敦道，鬧市中有寧靜嘅休閒，都幾寫意。野食方面，有七款lunch set揀，咩都有啲，睇你想食咩。我地比較肚餓，一個食豬鞍，一個食西冷。首先係餐湯，蕃茄蔬菜湯，酸酸地幾開胃。餐包係意大利進口面包，焗暖左外脆內軟，可以配埋橄欖油同黑醋食。炭燒西班牙豬鞍配紅酒汁配薯菜 $108炭燒美國安格斯西冷配紅酒汁配意粉 $128兩個都係用紅酒汁，帶有少少甜味，而且香，無論係配豬鞍定西冷都更加惹味，兩款都鎖住到個肉汁，咬落唔乾身，而且size都可以接受，肥肉都無話特別多，當然西冷同豬鞍嘅口感會有少少分別，視乎各人口味啦。最後嘆番杯熱檸水。兩人連加一總共$260。