Odelice! (海之戀商場)

海之戀有間餐廳，由法國人主理，運用傳統法國食譜後融入亞洲風味創造多款特色菜式。中午、下午茶同晚市亦有唔同套餐供應。餐廳行親民路線，用平民價就可以食到高級法國菜！Brunch Set 最平$95，包括頭盤、主食同飲品，另可以優惠追加其他食物，難怪Full House。頭盤有西班牙白毛豬火腿，肥瘦適中，味道鹹香，建議叫埋煙三文魚拼盤，夾住麵包食更滋味。主菜有烤龍蝦燴飯，龍蝦以芥末荷蘭醬烤焗，配上龍蝦番茄醬汁，味道偏清淡，可自行落檸檬汁調味，飯粒帶咬口，試試無妨。相比之下更喜歡阿根廷安格斯肉眼牛排，建議叫三成熟，牛味突出，薯條亦要趁早食，唔係嘅話會腍晒。另外加點咗個芝士蛋糕，同想像中有啲出入，無論係口感同味道都似疏乎厘，不過特別之處在於上面多咗紅莓醬，食落感覺更開胃。飲品方面有泡沫咖啡同Fruit Punch，前者帶淡淡咖啡香氣，後者味道酸甜開胃，十分解暑。