POP vegan (已結業)

今晚同朋友喺中環食飯，揀咗蘇豪區嘅呢間vegan餐廳。餐廳位置都幾隱蔽，要喺樓下撳鐘，行條長走廊上樓梯先到，好彩朋友預先訂咗枱。Sangria：同出邊嗰啲唔同，生果唔係一片片係切一粒粒，紅酒味都幾重，冇飲開酒可能會唔慣。Smoke vegan tuna salad：呢個沙律賣相好靚，七彩繽紛，入口味道好多層次，必食！Vegan beef Wellington：食落去其實唔係好似肉，舊肉比較鬆散，不過係素食，唔可以太多要求。酥皮做唔到香脆效果。個薯蓉整得幾好，西蘭花白灼冇調味。Tomato lover risotto：碟飯中間有成舊洋蔥，食落唔係好重洋蔥味，好腍，應該係係用湯煮。啲飯煮得啱啱好，硬度適中，蕃茄味好濃郁，加埋新鮮蕃茄仔，鍾意食蕃茄一定要點。總括而言，味道唔錯，環境舒適，侍應服務好好，本身唔係vegan都啱食。不過唔算平，建議多啲人嚟食share。