基隆茶餐廳

營業中

休息中

知道呢間茶記老闆的故事後，專程去太子食晏支持。推門內進，見到長者、學生哥、寫字樓人、露兩點大隻男，同埋拖住仔女的師奶，唔少人食緊是日午餐蒸肉餅、揚州炒飯、芝麻雞飯同焗豬扒飯。碟碟份量足，焗豬賣相唔錯。為咗滿足食炒麵的小願望，叫咗乾炒豬扒意加熱奶茶。幫手落單的侍應係中年大叔，佢好有禮貌，冇粗聲粗氣，仲會同客人講唔該！呢度的樓面都係中年人士，落單會慢啲啲；將 A 枱的食物送咗去 B 枱，當發現搞錯，會同客 say sorry ；人多亦唔會趕客。間中同熟客仔講兩句互動，有熟客一坐低就自動波叫照舊，街坊人情味就喺間舖飄吓飄吓咁。熱奶茶唔係用厚身耳仔杯改用玻璃杯，有少少失望。茶味較淡，適合喜歡淡口的朋友。主角乾炒豬扒意粉料多，豬扒有八小塊，全肉的同連骨的都有，食落唔係香口脆炸嗰隻，有啲肉質好硬，有啲又啱啱好。意粉炒得好有鑊氣，陣鑊氣聞到又食到。意粉喺碎咗啲，但唔喺林到入口即溶；洋蔥絲唔生，係有花時間炒過，夾埋芽菜同意粉食好正。油唔多，碟底冇一氹油。開動後想加辣，見枱面個調味盤好骨子兼整潔，筷子同湯匙放喺枱面有蓋膠盒內自取，衛生過上巿嗰間好多。