王牌·圍一叉燒

營業中

休息中

今日因為踩單車，所以就去咗大圍一轉。喺踩之前想搵啲嘢醫下肚，於是就睇吓附近有啲乜嘢餐廳值得試吓。一出大圍站，就見到呢間王牌唯一叉燒好多人排緊隊，有拎外賣嘅亦都有堂食嘅。見佢出名嘅係叉燒，於是就嗌咗一個雙拼燒味飯，我就揀咗叉燒同埋油雞。一埋位就會有碗老火湯，口味比較濃郁。講返個飯，個叉燒佢話係蜂蜜醃製，食落真係比起出邊嘅冇咁鹹之餘，亦都唔會過分甜，味道平衡。至於肉質方面，我會覺得瘦嘅部份比肥嘅多，大概七比三左右，好彩我比較鍾意食瘦嘅叉燒，所以就好啱我口味。而油雞方面，啲雞皮又薄又爽口，都入味。而肉質方面未至於好嫩滑，但仍然合格。配菜有三條菜心，都新鮮清甜。而飯嘅質地都乾身粒粒分明，唔會又淋又爛。整體嚟講，我會幾推介呢間嘅叉燒，下次有機會想試吓佢另外推介嘅滑蛋蝦仁自家製XO醬飯，因為見到好多人都嗌。