8鍋臭臭鍋 (金巴利道) (已結業)

已經食過幾次，想食台式火鍋都會食呢間！中午午市都幾抵食，$88一個鍋，包一個飯或粉絲，再加一杯紅茶或綠茶🍵不過就要收加一服務費。之前食過藥膳羊肉，招牌臭臭鍋，都幾好食，今次試下佢個季節限定先！黑麻油雞係台灣生完小朋友必食嘅補品，但對於手凍冰冷嘅女仔都有調理嘅作用，我呢啲咁體虛嘅人就啱曬啦！🍴黑麻油雞鍋 $88一上枱，好香麻油味，有杞子，濃濃大補湯嘅味道，但食落係咸咸香香，唔會有中藥味，個湯好好飲，飲完成個人暖曬！啲料都好足！有雞肉，娃娃菜，炸枝竹，金針菇，磨菇，淮山，米血糕，沙白，鳴門卷，珍珠筍，台灣米線，玉子豆腐，牛丸，素飽魚。雞肉係普通雪雞扒，料就冇話特別新鮮，都係雪嘢，但勝在足料，同個湯好飲。可以自己調醬，店舖推薦沙茶醬，豉油加蒜蓉，百搭又香口！份量好多，又麵線又粉絲，食唔曬，好飽下。🍵綠茶 跟餐送 (微糖去冰)台式綠茶，茶味好濃，濃到有啲澀，微糖啱啱好！推薦指數: 8/10一人一鍋，抵食又正宗嘅台式火鍋，有辣有唔辣，九款湯底總有一款啱你口味！