Camellia (已結業)

呢間都算係尖沙咀嘅出名人氣打卡餐廳，主要因為粉紅色主題、花牆同靚下午茶架。今次下午茶時間嚟到，不過為咗用會員現金券，一定要叫正價食物，未有機會試到佢哋嘅下午茶層架，下午茶層架set仲會送一條手鏈添。首先叫個飲品先，叫左個熱花茶，有個小火煲住，都幾靚。strawberry passion fruit tea，偏甜。脆炸魷魚圈估唔到炸得幾好食，熱辣辣，粉唔多，魷魚都幾大條，點沙律醬食好味。野菌黑松露手工薯仔粉估唔到薯仔粉原來係咁樣，一個個波咁，成粒都係薯仔粉團，煙靭彈牙，不過食少少已經好滯。個黑松露好濃味。慢煮牛頰肉茄汁扁意粉188呢個汁幾好食，唔會勁酸。意粉有咬口唔會淋晒，牛頰肉好軟熟好入味。草莓忌廉牛角窩夫配香草雪糕原來牛角窩夫係牛角包嚟，仲係脆嘅牛角包，上面加上草莓忌廉，口感唔錯不過略甜，我會鍾意食翻真窩夫多啲。