心裡有素 (已結業)

聖誕節食多咗嘢好自然想食翻啲素食或者清啲去平衡下，行開油麻地記得同事推介過一間會定期派發愛心飯盒嘅良心素食餐廳 — 心裡有素，六月到而家已經派咗六千幾個飯盒！餐廳平時都好高人氣，我哋今次過嚟大概六點已經有人排隊。先比錢買飛再入座，晚餐時段成人$128一位，座位比較緊密，靠水吧嘅自助食品區都算大同多選擇！廚房出菜位旁邊係沙律水果吧，有多款蔬菜比客人mix，我就超鐘意有熟度啱啱好嘅牛油果同大粒又多汁嘅蕃茄，清爽健康！前菜有涼拌粉皮、青瓜、木耳、糖漬蕃茄等，有一款涼拌麵特別用咗辣醬汁，刺激惹味！炸物選擇好多，除咗有炸茄子同南瓜，仲有鹽酥菇同秋葵等等，定期會炸起一輪，香脆可口，如果覺得唔夠濃味，可以自己再加岩鹽同胡椒！主食有粥、飯同各款炒粉炒麵，另外仲會不定時推出限量食品，例如今日就有時令芋頭煲仔飯、咕嚕合桃同酸甜淮山，其中芋頭煲仔飯熱辣辣又香軟，咕嚕合桃入味微酸，口感香脆可口！飲品有多款茶飲，個人尤其推薦十五年陳皮薑茶，微辣薑味飲落幾開胃又養生！