阿木台灣麵 (廣華街) (已結業)

一直都覺得香港唔係太多好食既台灣麵，聽朋友講依間都幾好，就一於黎試下係咪真係好食。夜晚時間基本上都好多人排，如果要食既話我建議係手機用”gulu”拎左飛先，咁就唔使等咁耐。手機拎左飛大約半個鐘左右就入得，鋪頭比較細，所以都坐得比較逼，牆上面貼左好多佢地既產品，有拌麵同各種小食都有。我地今日唔係太肚餓，所以淨係叫左兩個主食加一個小食，分別係紅燒牛肉牛筋麵 / 麻辣肉燥拌麵 / 鹽酥雞。紅燒牛肉牛筋麵，牛肉好淋，唔使點咬就食到，個湯有陣陣香料味，加埋酸菜食都幾開胃，但我發覺加左佢地自家制既辣椒醬完全係將成碗麵昇華左，鍾意重口味少少既一定要加，會令成碗麵好食好多。麻辣肉燥拌麵，依個係出奇地好食，超級開胃，唔會太辣，好惹味，令到人食唔停既選擇。鹽酥雞，炸粉唔會太厚，食菅都唔會好乾，有人覺得佢好淡，但我自己唔食咁咸就覺得岩岩好，鍾意咸D可以自己再落調味粉。