泓一拉麵

營業中

休息中

煮干醬油湯底味道同香氣都ok，魚香味突出亦食到昆布味，鮮甜冇苦味，但少少偏鹹，配料有頗多生洋蔥，個人覺得同湯底唔夾，有啲搶味。湯面油份多，令麵食落滑身啲。高加水麵條質地不錯，夠滑身爽口，唔會煮到過淋。豚x雞白湯上枱睇落好creamy，但食落未到好濃郁，雞味較重，但豚味完全被蓋過，唔算好特別。麵條同醬油湯嘅唔同，帶麥粒麥香會較出。兩碗嘅配料雞肉正正常常帶煙燻味，唔算好嫩。慢煮叉燒肉質唔粗都有肉香，荀都ok冇奇怪異味，可惜隻蛋太生，蛋黃太流心而且唔夠入味。整體嚟講覺得兩碗都合格但未算好抵食好完美，麵嘅份量不算好多，男仔食應該都要加麵。個人就比較鐘意煮干醬油湯。餐廳仲係試業期，見到之前不少評論都話檸檬或柚子較多餘，當日去餐廳已將佢地刪減，相信佢地會聽更多意思再作改善。