麻布茶房 (已結業)

星期五晚，預咗要等位，呢間都唔例外。見到有四個女仔係度等位，其中一個同個侍應嘈交，跟住無等到就一齊走咗嘞...雖然唔知誰是誰非，不過都知好多人話呢間d service差>.<又唔使等好耐位既，大約等十分鐘就有位。周圍差唔多全部都係年青人，我哋叫咗三樣人氣食品，有麻布雜錦燒烏龍麵($73.8)，其實係類似廣島燒餅，不過似係烏冬麵，加上椰菜、豬肉及日本甜醬汁，幾好食，隔離兩檯都點咗呢樣。另外仲有蕃茄牛柳蛋包飯($64.8)，沒有蕃茄汁味，牛柳食落似牛腩多d，雖然蛋有蛋香，但我認為唔算係人氣推介食品。甜品黑芝麻慕磁芭菲($47.8)就不錯，黑芝麻雪糕有香濃既芝麻味，慕磁煙煙靭靭咁，加埋紅荳、香滑既雲呢嗱雪糕一齊食，幾好味。不過呢個芭菲收成四十幾蚊，我覺得都幾貴。呢度好似唔夠人做嘢咁，好少有人加茶，侍應又無乜笑容，服務態度真係一般啫。好奇怪，食品價錢通常都係八毫子做尾。