十二味 (如心廣場二期)

營業中

休息中

剛開張嘅時候已經想食，奈何超旺場要等成十幾張枱，所以被迫放棄。今次專登早啲攞位，但都難逃等待嘅命運，等咗足足半粒鐘終於可以入座。食物種類簡單，主要以酸菜魚同香辣炒鍋做主打，配上些少川味小菜，大部份以香辣為主，最貼心嘅地方係有兒童餐提供，即使成家大細嚟食，都唔怕冇嘢啱小朋友食。酸菜魚只有辣同唔辣可以選擇，嗜辣嘅我當然揀辣，份量算多，一盆已經差唔多霸佔晒成張二人枱。魚切得夠薄，但又唔會一夾就散，配上又酸又香又辣嘅湯底，更顯得魚片又鮮又滑。任何香辣嘅湯底都離唔開薯粉，佢嘅粉條質感似薯粉，呈透明狀，入口比薯粉軟滑些少，配搭鮮香濃郁嘅湯底，絕對係絕配！除咗酸菜魚之外，當然要品嚐一下佢嘅香辣鍋，我哋揀咗非常邪惡嘅乾煸肥腸，豬大腸皮炸得非常酥脆，內裡依然保持口感，咬落去油香四溢，雖然配上大量紅青辣椒，但香口得嚟唔會太辣，加上白芝麻非常香口。本來想嗌慾望酸梅，可惜已經售罄，所以揀咗荔枝玉露，冰凍解辣，亦比我一個藉口下次再嚟。