世澄日本料理 (億利工業中心) (已結業)

食評唔多，圖像左上角又有綠條，以為新店，一問之下，已開業踏入四年，只係老闆易手，廚、侍不變。此餐牌是日剛好新鮮出爐，每套餐追加一項，呢部分算幾抵。先嚟嘅「 極上牛肉黑蒜油烏冬」，飲啖湯底，好鹹，但黑蒜油嘅黑油偏少，出現較少喺湯麵類現身嘅溫泉蛋（湯麵似乎用番溏心蛋合適，溫泉蛋一𢳂即散遇湯即化較合撈丼飯），有大量嘅粟米粒同海苔。食唔到牛肉質量係咪所謂極上，因太鹹都掩蓋咗。「特上海膽當」名就咁叫，但海膽真係冇乜擔當，僅得一小截舌頭嘅大細咁多。而且整碗丼個size 係兒童份量嗰種，一望已知唔能夠填肚，定必要追加。掩不住好奇臨尾追加個「海膽天婦羅」，似係用紫菜包住蛋漿皮內藏少許海膽肉去炸，兩份切開四件，得四條拇指粗、中指長嘅炸海膽，剩番一條綠色物體係炸幼辣椒，總體算好食但要催眠自己係食緊有海膽嘅嘢，實在含量太少，收$108略嫌咋舌。補充番，晚市係冇單上面寫嘅前菜麵豉湯沙律附送。