蘭香茶餐廳 (已搬遷) 新店位置

睇到有些食友嘅食評，都係話去到旁邊嘅嘉樂見到冇開門先至過來呢度幫襯。估唔到今次自己都係一樣...一心想帶太座去試試嗰個八隻蛋嘅奄列，但撞正端午休市，不得要領。不過都不太緊要la，反正自己已食過多次....究竟呢度嘅水準係唔係真的及不上嘉樂呢 ? 講真，又唔見得噃老實講，嘉樂嘅出品勝在一味夠大份，講味道就真的算不上很出色。呢度嘅份量就比較"正常"，講味道，絕不比嘉樂遜色，甚至可能仲好DD添....淨係睇睇嗰件西多士就知一二。望上去，賣相有點兒像响西貢泗益食到嘅出品。顏色呈淡黃色，應係醮上蛋漿後慢慢煎炸的，吃落口亦冇咁油膩，跟平常吃到嗰種放入滾油炸出來嘅完全不同。跟泗益嘅最大分別係冇夾入咖央醬，只係靠牛油及糖漿嚟俾味。太座覺得有點美中不足 (因佢比較喜歡有花生醬餡的)，我又覺得冇乜所謂，好嘅西多最緊要有蛋香、麵包夠軟熟及牛油糖漿份量下得夠重手。呢度嘅出品已很不錯，絕對食得過...茶走冇乜茶澀味，飲落滑口順喉，很不錯....聽講呢度嘅烘厚多士係名物，就叫份油多試試。所謂嘅厚多，以依家坊間水平來講，實際上並不算厚。包質感的確頗軟熟，牛油夠多，搽上剛烘起嘅多士上面，呈半溶狀態，又香又好吃....