Pho Metro (已結業)

炎炎夏日，都係冇乜胃口，所以一切可以凍食既野都成為我既最愛😍食左幾日日本野，今日一於回歸越南撈檬既懷抱🤣講起越南野，銅鑼灣呢間開左冇耐既餐廳係我既「口袋名單」之一！Pho Metro 都幾得意，皆因佢係加拿大回流既😝um，我都有聽過話美國、加拿大既越南野好出色（朋友話正過當地，我未去過不置計啦！）我估可能老闆係加拿大華僑？！講返野食先，我多數係午市黎既，佢冇 lunch set，但可以加錢（大部份+$18）配飲品/小食。我點左個雞排撈檬，朋友叫左生牛河。佢地個雞排超超超好食，好多汁，雞肉都好嫩，唔會 overcook 😍 不過個檬粉底要扣返少少分，因為檬粉反而似米粉，有幾次仲結埋一舊，即係好似 D 面煮好左好耐缺水個情況。配菜方面，芽菜好多好生，一開始真係食唔慣，都有諗過冇下次，但因為雞排太好食，所以⋯⋯其實可以要湯檬既，但我鐘意食凍😅至於個生牛河，我冇試，不過見到切到好薄，朋友本身係牛魔王，見佢都食得津津有味，應該都唔錯。另外仲叫左個上湯芥蘭，湯底唔錯，但唔夠香唔夠濃。雖然整體唔係最好，不過為左個雞排，我會回訪再回訪！