爽爽麵店 (已搬遷) 新店位置

2019年2月9日 (星期六)令人回味的醉雞米年初五(星期六)唔駛返工想食醉雞，又想避開人多時段，朝早先打電話確保爽爽有開市。10點半左右到達，只有零星顧客，未見虛冚，叫咗多蔥冰鮮雞米，一於慢慢歎。酒香撲鼻，雞肉已熟透，唔會有血紅色，嫩滑無比，皮肉易分開，連皮食又得、唔食皮又得。隨雞奉送的雞雜係精粹。最鐘意食雞膶，鬆化無渣，蘸㸃醉雞汁，鮮甜軟滑，齒頰留香。米粉多蔥無欺場，份量澎湃，盛惠35蚊，超抵食！物以罕為貴，想食雞膶就要早，賣晒就只得雞腎！落單小貼士：雞胸、雞脾、冰鮮、新鮮任君選擇！爽爽醉雞汁係美味靈魂，覺得冰鮮雞比新鮮雞更抵食！下次再介紹其他招牌嘢食！老闆好細心 詳列當月休息日 免得客仔白行一趟！