大門橫丁串燒手打烏龍麵店 (已結業)

呢間野嘅牛脷同烏冬實在令人回味。上星期獨個兒食晏，梗係去回味回味啦！叫咗個咖哩牛脷撈烏冬 ($34)。呢個美食只得午市有，晚市menu係無嘅。坐喺bar 枱前，可以見到師傅們忙碌咁行黎行去，煮黎煮去。由於都幾多人，所以等咗15 mins先有得食。咖哩汁夠多，稀稠適中，包晒每條烏冬。咖哩不辣，又有薯仔粒。烏冬煙韌又彈牙；最出色當然係牛脷啦！有五塊厚切牛脷，塊塊都有成1cm 厚。口感超正，牛脷好軟滑，塊塊都好淋，吸晒咖哩汁，真係令人好回味！質素超好，也能保持水準。