新蒸武門 (已結業)

唔知由幾時開始，食「住家飯」對我呢啲窮忙香港人黎講，好似慢慢變成左一件奢侈既事……出街食住家菜，聽落有點諷刺，但何嘗都係想收工可以食餐安樂茶飯而已。驟眼睇見餐廳名「新蒸武門」，仲以為食既都係蒸煮為主既功夫菜式。原來午市先係食健康蒸飯為主，晚市主打一系列健康無味精既住家菜。未點菜，店員先為我地泡了八寶茶 (有甘草，菊花，雛菊，紅棗、杞子等)，據講有去膩消滯功效呢。既然如此，一於先叫半隻「招牌宮廷香辣雞」(由於我地本身都唔係好辣之人，所以同左店員講叫少辣)。香辣雞炆得都夠入味，經過走油，本身已相當香口，只係雞肉稍嫌有啲乾。重點係加埋爆香左既蔥蒜炒埋一碟，最啱用黎餸飯食！半隻雞份量其實不少，絕對夠我地兩個人食。另一道家常「蒸選」係「土魷蒸肉餅」。呢度蒸肉餅都係即叫即蒸，唔似出面有啲預先蒸完攤係度，所以食起黎一啲都唔覺得乾。只係略嫌有點油，如果再少油啲我個人覺得更住家菜feel。呢個時候飲番杯八寶茶就再適合不過。食完較重味既家常菜，最後都叫番碟「翠玉瓜雲耳炒百合」。味道雖然平平無奇，但咁先可以番百合雲耳本身既原味，亦令人記掛住家菜味道……今夜難得同好友食餐安樂飯，享受相聚時光，滿足矣。