米走雞 (昭德大廈) (已結業)

雖然減肥係一世嘅事業，但有時都要放鬆吓，食啲邪惡野，今日就嚟食芝士雞煲😈餐廳環境好企理，枱與枱之間有好足夠嘅空間，就算放咗防疫嘅隔板，都唔會覺得逼夾。芝士雞煲叫咗一個小嘅，兩個人食非常足夠。芝士味非常香濃，熱辣辣嘅芝士配埋滑嫩嫩嘅雞肉，超級大滿足，而且份量好多，我哋一人食咗好多舊都食唔晒。食完雞煲就加芝士湯打邊爐。叫咗一份羊肉，賣相都幾靚，食落有羊味但唔騷，就算淥耐咗都唔韌，滿意。蜂巢豆腐上枱嘅時候係幾舊大冰塊，嚇咗一跳。超級多窿，非常之吸湯汁，而且口感軟得嚟有少少咬口，好快就食晒。粟米份量唔算大，但超級香甜，好食。油墨菜細得乾淨，切得整齊， OK。整體來講幾好味，又好坐，店員招呼亦好，有笑容，絕對有下次。