囍囍 (已結業)

今晚同小朋友去咗西環探完朋友經過呢間粵式小館, 見佢門口靚靚又乾淨便二話不說入咗去醫肚。其實我地都吾知食咩好, 大少又醃尖, 又要遷就細少和大小姐兩位小朋友的喜好, 於是叫咗個清清甜甜的蜜餞鷄翼和酸酸甜甜的杭州排骨, 兩樣菜式餸飯一流, 兩個小可愛爭住食, 食飯都快咗好多。大少喜歡食魚, 便叫了個銀蘿鮮菌浸龍躉腩窩, 龍躉鮮滑肉嫩, 個窩重有陣陣黑椒和白蘿蔔香味, 好味到連湯都飲埋。而我最愛飲湯, 見到呢度出名老火湯, 於是我便叫了一盅杏汁花膠白肺湯, 這湯有濃郁的杏仁味, 而花膠和白肺份量十足, 還加了原隻雞腳和豬骨去燉湯, 無味精無添加, 原汁原味, 飲完真係好潤好滿足。估吾到入到這小小餐館任點幾樣都已經好有水準, 而且四個人食, 埋單都只係三百幾, 真係值得推介俾大家啦！