梨滿園韓國料理 (已結業)

平時我好鍾意食日式燒肉，今日朋友介紹我嚟樂富試呢間韓式燒肉，估唔倒又幾驚喜。$188一位的燒肉放題，竟然有頂級韓牛，仲有美國安格斯牛粒！ 至愛頂級韓牛肩肉，肉色靚，夠新鮮，燒幾十秒，再配個韓式醬/生菜食，不錯。最驚喜既係放題竟然有豬大腸，牛脷同雞腎。豬大腸燒完超香，慢慢燒個皮又脆，入面又嫩，好正。黑豚腩肉我就覺得有啲肥。除咗肉類，海鮮有蝦，帶子，魷魚同青口。估唔到個樣又幾新鮮，青口仲好細心咁有調味。餐牌上仲有好多熟食，我哋嗌咗一個迷你韓式煎餅。嚟到原來都幾大份，但係估唔到好好食，粉漿調得好，煎得外脆內軟，可以一試。另外試咗炸豆腐同炸雞，炸豆腐皮脆豆腐滑，幾好。炸雞都ok。韓式蛋卷幾得意，有紫菜起入面，口感唔錯。最後嗌多咗一個豆腐辣湯同芝士年糕拉麵。豆腐辣湯又幾好味，鍾意食辣嘅我覺得好開胃，明明已經好飽，我都飲咗一大碗，仲幾足料添。芝士年糕都唔錯，年糕夠彈牙。放題嚟講，佢嘅熟食比起好多放題都出色。不過要提大家佢嘅份量都唔細，想試多d熟食嘅朋友就要留肚，前段唔好食太多燒肉。最後食埋雪糕，好滿足。真心覺得呢餐燒肉放題性價比幾高，下次會再嚟試下其他熟食。