稻八日式火鍋炸物放題 (已結業)

極上魚生/和牛火鍋放題之行今日就同朋友黎到荃灣行街，兼聽朋友介紹，搵到依一間超級好味道嘅任飲任食魚生+和牛火鍋放題餐廳醫肚，好期待呀！依家餐廳位置方便，喺正荃灣區最旺嘅地段，餐廳主打高品質食物放題，為食嘅我當然要黎會一會佢啦！餐廳嘅環境好舒適，卡位寬落之餘裝修都好時尚新淨，好適合一班朋友聚餐。難得魚生任食，咁第一輪緊係先點咗魚生刺食試下先啦！估唔到依度嘅魚生種類齊全，連帶子依類貴價刺身都有，質素非常之高，拍得住專食日式放題嘅連鎖店！睇下啲刺身幾肥美！食完一輪魚生之後，當然要食返主菜，和牛火鍋啦！依度嘅和牛未放落鍋就知道佢質素高，牛肉紋理分明，而且有好多唔同部位嘅牛肉提供，滿足晒一眾牛魔王食家。而最驚喜竟然係有手切牛，食落去口感味道係同楊屋道街市某間出名嘅本地牛不相伯仲！好感動呀！另外依款牛舌非常軟滑，我未試過一間任食牛舌係咁好味㗎，值得推介！除咗火鍋之外，店入邊竟然有自助天婦羅提供，自己一手一腳試吓製作天婦羅，可以話滿足晒大人細路嘅需要！至於其餘嘅蔬菜飲品都一應俱全，任食火鍋來講都真係冇乜挑剔。依間任食火鍋店，完全係超高質素，而且時間充足可以食足兩個鐘，真係物有所值！