韓牛牧場 (已結業)

朋友推介我去呢間韓牛牧場，貪呢度喺銅鑼灣中心地帶得嚟又唔難搵位。自助區有好多特色冷盤，無論係韓式嘅漬物，定係日式嘅冷盤，都同樣咁精彩繽紛。飲品都包羅萬有，有齊汽水啤酒無糖飲品。呢度部份食物係指定份量，2人份嘅6色刺身拼盤相當豐富，有三文魚腩、魷魚、𩶘魚、北寄貝等，新鮮又好味。四合海鮮拼盤有蝦、墨魚、扇貝同青口，燒海鮮認真一流。安格斯肉眼扒夠肉味，完全唔使點醬汁都咁香口。另外都叫咗好多唔同款式嘅牛肉，全部都係可以追加，燒烤邊款都咁好味。餐枱上嘅墊枱紙就有說明唔同種類嘅食物需要燒烤嘅時間，呢個燒烤爐方便快熟得嚟又容易控制火候，搞到我想買返個爐返屋企。韓式辣炒年糕味道偏辣，不過辣得嚟又幾好味。炸紫心香芋丸入面嘅芋蓉又香又滑，鍾意食香芋嘅我不停追加。和風炒雜菜炒得夠鑊氣，調味亦都做得好好，唔會過鹹。最後梗係要食返個甜品，韓式雪條都有好幾款，食埋真係夠晒滿足。