正宗水上人氣鍋專門店 (已結業)

久仰大名嘅一間餐廳，今日終於有時間喺午市去試試。有套餐亦都有單點，午市單點有七折，我地選擇左單點。先講價錢，蒸氣海鮮來講佢價錢算係相當貴嘅一間，淨係醬料花生同茶芥兩個人都收70幾蚊。而其他海鮮或者肉類份量都係相當之少。先講花甲，有鮮味但唔大隻， $88大約只有10隻。而蟶子呢，大約$70到一隻，但係佢放左啲南瓜蓉係聖子上邊蒸，味道有啲奇怪，明明落單嗰時係話蒜蓉粉絲蒸，落咗啲南瓜蓉搞到味道有啲差格格不入。和牛粒$198十粒，有牛味冇乜脂肪算唔錯但份量都係少。娃娃菜放咗啲肉碎上去一齊蒸，冇乜特別，真係完全烚菜咁，而且肉碎又唔夠多，唔建議叫。成餐飯有樣極級難食嘅嘢，就係佢個花膠豬骨粥。完全未食過咁難食嘅粥，白粥都好食過佢。而且落單嘅時候侍應同我地講個粥(細)係五人份量，但實際嚟到係極少，大概只有三碗，唔知係唔係因為餐廳見我同朋友得兩個人所以特登比少啲材料。總括嚟講呢間餐廳嘅食物實在份量太少，而且有啲唔老實，叫之前又話個份量係幾多，嚟到之後完全唔係佢講嗰回事，而且食物味道中下，有一部份直情係難食。