古早牛肉麵 (已結業)

餐廳裝修別出心裁，好多特色畫、燈箱，水泥懷舊風，就好似入去台灣小店咁。晚市7點，不論堂食或外賣，都好多客人。提供多個2人座位，侍應冇限你坐邊，揀位好free，亦有禮。餐牌上提供多款台式小食，飲品都有一整頁，自己tick好俾侍應就得，膠餐牌可重用，環保又唔怕落錯單。酥炸大豬扒肉燥便當($60)，肉燥唔會太鹹，送飯一流，飯量多到飽肚。豬扒超大塊，外層酥脆，肉厚唔乾，亦冇甩皮狀況。滷水大腸麵線($32)，大腸滷得入味，麵線羹稠杰，有陣陣麻油香味。起司蛋手抓捲餅($38)，捲餅酥酥得黎軟，包得夠實，配料唔會散開到周圍都係，但捲餅易咬。芝士、蛋組合一定冇錯，仲有大量椰菜，清爽解膩，捲得仲好靚，見到每一層。台式小香腸($30)，肉汁juicy，好香口，逼哂d油花出黎。一碟4條唔夠喉，因為好食到停唔到口，好掛住台灣。伴碟仲有醃蘿蔔添。招牌珍珠奶茶，主食配一杯飲品可減$10，茶底香，珍珠煙韌量多。而芭樂蘆薈多多($25)，蘆薈粒多，多多消暑，仲有多款口味添。整體，值得讚係，唔需要等好耐，就可以食到熱辣辣既食物。而且每碟既份量都好足料，價錢唔貴亦冇加一，抵食。