文輝墨魚丸大王 (已結業)

星期日想喺中環食碗麵都排曬大隊， 幾間出名嘅麵店都要等位。因為趕時間， 唯有去咗呢間冇人排隊，兼有位淨嘅文輝墨魚丸大王食碗麵， 諗住快靚正， 點知....既然呢度叫墨魚丸大王咁把炮, 走嗌碗紫菜墨丸河試下， 以為冇死啦， 點知伏已中。 同阿姐落單嗰陣諗住叫佢加腩汁， 點知加腩汁原來要收兩蚊， 乜咁小家都有㗎， 條氣唔順，所以冇加。一上枱碗墨丸河 一睇啲色水就知唔好食， 個湯基本上係滾水加少少鹽， 雖然個河粉幾滑， 不過粒墨丸就真係令人大失所望， 既唔彈牙， 亦唔爽口， 食落仲好多粉， 質素方面同佳X 買到嘅差唔多。枉佢仲打正招牌賣墨丸， 原來質素咁差， 一定冇下次。