桔梗 (已結業)

聽朋友講呢間cafe食物高質，環境舒適，今日係旺角行街經過就入咗去食，餐廳有兩層，門口走簡約風，入面有唔少打卡位。餐廳主打係牛肉，我哋點左明太子鍋燒烏冬配炸吉列和牛。見期間限定幾特別，就點埋炸雞與芝士歐姆蛋配咖哩醬。明太子鍋燒烏冬配炸吉列和牛炸吉列和牛表面炸得金黃，外脆內軟，五成熟牛肉咬落非常軟身，肉質鮮嫩，食得出係高級牛肉，不愧為熊本縣生產嘅極上和牛。明太子比想像中多，糖心蛋煮得恰到好處，烏冬爽身滑口，仲有好多配料，最得意嘅心型魚蛋好睇又好食。炸雞與芝士歐姆蛋配咖哩醬Daily special比想像中豐富，除左炸雞同芝士歐姆蛋外，仲有新鮮嘅蔬菜沙律，以及烤得金黃嘅麵包多士。炸雞雖然外表平凡，但食落好有驚喜，因為炸嘅火喉控制得非常好，表皮粉漿簿而脆，而入面嘅雞肉肉汁仍然鎖住，唔會炸得過老。歐姆蛋亦係高質，蛋煎得香滑，入面中間啖啖芝士拉絲，配合秘製紅酒巧克力咖喱醬汁，成件事完全冇違和感。總括而言，餐廳食物質素髙，環境舒適，下次有機會會再去。