Pho Metro (已結業)

Pho metro9點多睇完戲，肚餓到不得了！本來特登黎食特級軟殼蟹蟹肉湯檬，但晏左黎，軟殼蟹已經賣光光啦！嗚......我地只好叫蟹肉湯檬！之前有同事黎食lunch， 話特級軟殼蟹蟹肉湯檬好足料，軟殼蟹仲即炸好酥脆！ 今晚冇機會食到！嗚！ 咁食住蟹肉湯檬先？嘩！嚇親寶寶！ 好大碗， 份量多到2-3個人食都得🙈好豐富啊蟹肉湯檬一到，即刻飲啖湯，湯底果然夠足料有濃濃既蟹膏，湯質稠稠，味道鮮甜！大大粒豆卜飲滿蟹膏湯水，好吸味！正！真係好多蟹肉同蟹膏！ 食極都仲有😂就連肉丸都好有份量！大粒如乒乓球! 肉丸裏有蟹膏，用左胡椒去調味，少少辣更惹味！另外， 叫多個煎蝦餅，蝦餅有別平時係炸得油油蝦餅，香煎既蝦餅表面乾身，食落口微微脆，蝦肉緊實豐彈性！同友人一致好評！ 好快手就食哂，準備想叫多一份時，已經過左last order時間啦！ 嗚，好味，唯有下次再黎食你啦 蝦餅！整體來說，雖然價格係比一般越南餐廳貴，但份量巨多，用料豐富，唔係馬馬虎虎！一讚！建議蟹肉湯檬係2人食用，除非係大胃男女！否則食唔哂就好浪費啦🤭