名捌月 (已結業)

估唔到荃灣街邊都會有呢啲高級嘅西餐廳，望到裡面格調都幾高尚，氣氛都不錯，所以就入咗去試吓啦。Menu上邊都幾多款選擇，仲有套餐一set set俾你揀，但係我同朋友都唔係好食得多野，所以我哋就各自散叫左一個主食，但佢個主食都可以配餐湯同埋飲品，所以其實都幾抵又豐富。餐湯到咗之後本身都唔知係乜嘢湯，但係一飲落去就已經好明顯知道係一個蘑菇湯，佢唔同平時嗰啲餐廳咁放忌廉，所以佢可以叫做一個純蘑菇湯，非常之咁香蘑菇味。而佢配左啲餐包，啲餐包食落口感似麥包，都幾特別，再配埋個蘑菇湯簡直一流。主食終於到啦，呢個係日本霜降西冷牛扒，都有成八安士架，叫咗店員比七成熟，嚟到入口啱啱好，肉質鮮嫩，多汁。另一個就係松葉蟹肉蟹膏意粉，成個松葉蟹蓋連埋啲蟹膏畀晒你，份量非常之多，亦都好鮮甜，而啲意粉佢用咗雜菌去炒，再加埋好多好多蟹肉同蟹膏一齊，變咗成個意粉好香蟹味，亦都唔會話腥味，值得推介。飲品佢亦都有好多選擇，有特色飲品，右邊呢杯就係菠蘿特飲，係將菠蘿汁溝梳打水，好香菠蘿味甜甜地嘅有汽果汁，相當不錯。