源記餐廳 (已結業)

星期日晨咁早起身做運動咁辛苦，梗係要食番個靚早鼓勵下自己。因為做完運動有啲熱，唔想食有湯粉麵嘅餐。行到大圍，早上8點幾嘅源記人少少，加上佢有西式早餐，一於入去食。西式早餐我揀咗炸魚、煙肉、炒滑蛋，配茄汁豆、薯餅、多士，仲有熱飲(我叫咗茶走)都只係$38。喺等緊食物之際，有位剛入餐廳女士疑似有腳傷，因為不斷聽倒有店員哥哥叫佢小心啲行、唔使急，都幾温暖。炸魚外皮略嫌炸得太燶，但魚肉就剛好熟，魚柳仲係好多汁，如果可以用小量盬同胡椒粉醃肉後再炸會好味啲。煙肉煎得唔夠燶同脆、炒滑蛋就剛好熟又夠滑。多士有啲喜出望外，半片厚切，焗得脆而不乾，簡單配牛油，好味。茶走太多奶，令到茶味相對淡。